Узьлянка - рака ў Мядзельскім і Вялейскім раёнах Менскай вобласьці, левы прыток ракі Нарачанка (басэйн Нёмана). Даўжыня 53 км. Плошча вадазбору 663 км2. Сярэднегадовы расход вады ў вусьці 4,8 м3/с. Сярэдні нахіл воднай паверхні 0,5 ‰. Асноўныя прытокі: Чорная, Ментынь (левыя).

Узьлянка пачынаецца каля вёскі Мазалеўшчына Мядзельскага раёну, вусьце на паўднёвым ўсходе ад вёскі Іжа Вілейскага раёна. Даліна ў высокай плыні невыразная, ніжэй трапэцападобная, шырынёй 1-2 км. Абалона ў высокай плыні разараная, яе шырыня 200-300 м. Ад вытоку да паўночнай ускраіны вёскі Наўры (15 км) рэчышча каналізаванае. Водапрыёмнік мэліярацыйных каналаў. Шырыня рэчышча ў межань ад 8 да 20 м.

Сплаўны ўчастак пачынаецца пасьля маста ў вёсцы Наўры і складае 39 кілямэтраў. Ад маста ў Наўрах да маста ў Даўжанах два кілямэтры рака невыразная, цячэ ў вычышчаным рэчышчы, расьліннасьці па берагах няма. Вёска Даўжаны лічыцца класічным месцам для пачатку сплава. Сюды можна дабрацца рэйсавым аўтобусам з Менску.

Далей, да шлюза ў Сьвятках і потым да Рудзевічаў, рэчышча ракі Узлянка шырокае, каля 15 метраў. Берагі бязлесыя і высокія - каля 2 мэтраў, з лугамі пад выпас. Пасьля Рудзевічаў па правым беразе сустракаецца першы яловы лес, які застанецца недасяжным. Берагі зніжаюцца і пачынаецца забалочаная даліна, якая цягнецца да трыангуляцыйнага знака з адзнакай на мапе «167,4». На гэтым адрэзку лес да ракі не набліжаецца бліжэй 100 метраў.

На 13-м кілямэтры на пагорку з'явіцца першы даступны добры лес. На дзвухкілямэтровым ўчастку можна падабраць месца для стаянкі.

Да вёскі Ўзла рэчка віхляе праз хвойны лес, шмат абрывістых берагоў ад 1,5 да 6 мэтраў. Перад вёскай Узлы рэчышча пашыраецца, адчуваецца подпор невялікага вадасховішча і, на 19-м кілямэтры, рака перагароджана парэшткамі плаціны вадзянога млына. Тут прыйдзецца зрабіць абнос вакол будынка млына па правым беразе. Месца прыгожае і годнае для агляду. Праз 700 мэтраў сустрэнецца аўтамабільны мост шашы Менск-Мядзель.

Далей рака больш маляўнічая, працякае ў высокіх берагах з шчыльнай расьліннасьцю. На 23 кілямэтры пасьля маста на вёску Сіўцы злева ўпадае рэчка Чорная. На наступным сямікілямэтровым адрэзку да вёскі Ляскі можна выбраць добрае месца для стаянкі. Таксама цікавая рака і на чатырохкілямэтровым участку да вёскі Чырвоны Бераг. Да вусьця застаецца 5 кілямэтраў, на якіх Узьлянка прыгожа меандрирует ў высокіх берагах, зрэдку пакрытых лесам.

Геаграфічныя аб'екты на рацэ: в. Наўры, в. Даўжаны, в. Сьвяткі, в. Рудзевічы, р. Добрая, в. Узла, р. Чорная, в. Ляскі, в. Чырвоны Бераг

Выкарыстаныя крыніцы:
Блакiтная кнiга Беларусi: Энцыкл. / БелЭн; Рэдкал.: Н.А. Дзiсько i iнш. — Мн.: БелЭн, 1994.