Нацыянальны парк «Нарачанскі» да сезона-2014 рыхтуе сапраўдны сюрпрыз для аматараў прыроды і падарожжаў. Там распрацоўваецца цікавая экскурсійная сцяжына, якая прывядзе турыстаў на паўвостраў Чараўкі.

Перш за ўсё маршрут адметны тым, што за даволі кароткі час здольны пераправіць чалавека ад мітусні сучаснай цывілізацыі ў свет некранутай прыроды. І ўжо цяжка паверыць, што зусім блізка знаходзяцца досыць буйныя населеныя пункты — горад Мя­дзель, курортны пасёлак Нарач і шматлікія здраўніцы. Сапраўды, як па чараўніцтве! Паўвостраў і размешчаны там парк рэдкіх раслін — гэта ландшафтны, батанічны, геалагічны помнік прыроды рэспубліканскага значэння. Некалькі гадоў сумеснай працы супрацоўнікаў Нацыянальнага парка і Інстытута эксперыментальнай батанікі імя В.Ф. Купрэвіча НАН Беларусі дазволілі з мінімальным умяшальніцтвам у прыроду стварыць вельмі цікавы аб’ект экатурызму.

Непраходнае балота аддзяліла гэтую прыродную скарбонку ад знешняга свету. Экскурсія туды патрабуе пэўных ведаў і спецыяльнай экіпіроўкі, таму наведаць Чараўкі і парк рэдкіх раслін магчыма выключна з падрыхтаваным экскурсаводам. Дзіўнае багацце разнастайных форм рэльефу і прыродных экасістэм суседнічае на невялікім участку зямлі — 90 гектараў. Гэта суседства і стварыла ўмовы для вялікай разнастайнасці флоры, больш таго, там расце каля двух дзясяткаў рэдкіх і знікаючых відаў раслін, што занесены ў Чырвоную кнігу Беларусі і ахоўваюцца ў Еўропе. Тут можна пабачыць розныя экасістэмы: лугі, ядлоўцавыя схілы, хвойныя і ліставыя лясы, сапраўдныя джунглі з алешыны, забалочаны ручай, маляўнічае азярцо, верхавое балота з бабровай плацінай. Эксклюзіўныя пейзажы, складаны рэльеф, пагоркі і ўзвышшы з нагрувашчваннем валуноў, іскрыстая Нарач — гэта трэба пабачыць.

Унікальны прыродны комплекс дазваляе праводзіць там навукова-пазнавальныя батанічныя і геаграфічныя экскурсіі, арніталагічныя назіранні, туры для аматараў фота- і відэасафары. Дарэчы, падарожжа можа быць пешым і веласіпедным. Як запэўнівае адміністрацыя Нацыянальнага парка, веласіпеды ўжо набылі і біноклі таксама.