Дабрачынная акцыя "Тыдзень лесу” праводзіцца Міністэрствам лясной гаспадаркі з 2007 года, з той пары ў ёй прынялі ўдзел больш за 250 тысяч чалавек, паведамляе "Браслаўская Звязда". Яна дае магчымасць людзям бліжэй пазнаёміцца з лясной гаспадаркай, даведацца, як ствараюцца і захоўваюцца нашыя лясы, а таксама ўнесці непасрэдны ўклад у памнажэнне лясных багаццяў краіны.

Так, у мінулым годзе ў Браслаўскім раёне традыцыйнымі ўдзельнікамі акцыі сталі вучні Чэрнеўскай, Мяжанскай, Кансталінскай школ, якія на роўных з вопытнымі лесаводамі закладвалі новыя лясы. У добраўпарадкаванні тэрыторыі, ачыстцы лесу ад смецця і навядзенні парадку ў парку "Бяльмонты” прынялі ўдзел вучні Ахрэмаўскай школы. Навуковым аддзелам нацпарка для вучняў гарадскіх школ былі праведзены лекцыі на лясную тэматыку, а таксама экскурсіі на пляцоўку для феналагічных даследаванняў. Арганізацыі раёна таксама не засталіся ў баку: калектыў дзіцячага сада №3 правёў добраўпарадкаванне навакольнай тэрыторыі, а Браслаўская МРІ АЖ і РС, ТБЗ "Браслаўскі” унеслі ўклад у стварэнне новых лесапасадак у Іодскім лясніцтве.

Сёлета ва ўсіх арганізацыях нашай краіны, якія вядуць лясную гаспадарку, дабрачынная акцыя пройдзе з 13 па 20 красавіка. Прысвечана яна 130-годдзю стварэння мяча Колесава - спецыяльнай лапаткі для пасадкі саджанцаў лясных культур.

Па традыцыі прыняць удзел у акцыі запрашаюцца ўсе жадаючыя, якія сумесна з лесаводамі НП "Браслаўскія азёры” могуць стварыць памятныя пасадкі лясных ці ландшафтных культур, алей ці сквераў, навесці парадак у лесе, добраўпарадкаваць месцы адпачынку.