Водная вылазка: рэчка Пціч
Калі: 23 ліпня 2010
Удзельнікі:
Федзюковіч Юрась (DzedFyodar)
Агейчык Геннадзь
Агейчык Мацьвей
Глявіцкі Геннадзь
Маршрут: в.Крупіца, в.Самуэлева, в.Зарэчаны; Менскі й Марынагорскі р-ны, Менскай вобл.
Прыслоўе
Толькі я сам сябе казаў пра тое, што два дні - гэта так мала, каб ажыцьцявіць паход, як вось плаваў у міні-паходзік на паўдні. Пачынаю думаць пра самапавагу. Нейкія нядобрыя тэндэнцыі. Спадзяюся спісаць гэта на жарцікі.
23.07.2010 - субота Суботнім, сонечным, ліпеньскім днём было вырашана праветрыць свае запацелыя ў горадзе целы і праверыць магчымасьць сплаўляцца ў вярхоўях рэчкі Пціч. Даўно я глядзеў на Пціч ад вытокаў і ня мог зразумець, чаму тут ня ходзяць байдарачнікі. Аказваецца такіх бешаных як я можна пералічыць на пальцах двух рук, дый і тое ў кожнага свой накірунак. Нехта ўздоўж мяжы соўкаецца, нехта па запаведнікам, нехта гэта робіць так ціха, што й не заўважна. А агульна атрымліваецца вялікі кайф ад дзікай прароды амаль пад самым носам, дый яшчэ з экстрымам. Вось і Пціч. Вы знойдзеце апісаньні толькі ад м.Дараганава, а мажліва знойдзеце і ад в.Праўдзенскі. Але гэта ўжо больш за 70 км ад вытокаў. І што гэтыя кілямэтры нельга прайсьці? Вось і вырашана праверыць на невялічкім кавалку: в.Крупіца - в.Зарэчаны. Пагналі!
З-за доўгіх збораў-перабораў стартавалі толькі ў 14:11 (згубілі добрых дзьве з паловай гадзіны, на жаль). Таму каб скараціць час пайшлі не па рэчышчы, а па каналах, якія якраз тут і адгаліноўваюцца ад Пцічы. Паўтары метры шырынёй, але добрая плынь. Крыху сустракаюцца зарослыя кавалкі на канале, але прайсьці проста.
Па каналах прайшлі амаль 4 кілямэтры і увашлі ў рэчышча Пцічы ля вёскі Самуэлева, пераадолеўшы перад гэтым двайны шлюз абносам па левым беразе. Азірнуўшысь на рэчышча Пцічы я заўважыў шчыльныя зараслі гарлачыкаў. Яшчэ невядома дзе было лягчэй плысьці.
Рэчышча Пцічы на гэтым кавалку выявілася вельмі прыемным як па заросласьці берагоў, зьвілітасьці, так і наяўнасьцю прыгожых завальчыкаў на палях старых мастоў і проста паваленых дрэвах. На гэтым кавалку ракі месцаў для стаянкі няма, але і разглядаць гэты кавалак як прыярытэтны ня варта. Аднак тут мне вельмі спадабалася. Даволі прыгожа. Ня гледзячы на ліпеньскую спёку праходзім цяньком пад навіслымі галінамі дрэў і таму спёка ня душыць, як на каналах. На 9-м кілямэтры падыходзім да в.Зарэчаны, дзе павялічваецца колькасьць кладак і самаробных масткоў. Сустракаюцца нацягнутыя металічныя трасы, якіх трэба асьцерагацца. І канешне насупраць вёскі сустракаюцца людзі. Хто адпачывае, хто купаецца, хто рыбу брэднем ловіць.
Мы прайшлі невялічкі кавалак, каля 12 кілямэтраў за больш чым тры гадзіны, але я быў вельмі задаволены гэтым кавалкам рэчкі Пціч. Спадзяюся, што вывучэньне Пцічы прадоўжыцца з такім жа настроем.
Тэхнічныя складнікі (час, кілямэтры, інфармацыя):
23.07.2010
14-11 - 0 км - старт у в.Кугліца праз 100 м ад мосту па канале ўздоўж рэчышча
14-27 - 1,7 км - ЛЭП
14-36 - 2,5 км - Шлюз на канале
14-51 - 3,8 км - Два шлюзы на каналах ля в.Самуэлева, абнос па левым беразе.
15-00 - 4 км - абнесьлі шлюзы, праз 50 м. русло Пцічы
15-22 - Рэшткі драўлянага мосту, палі, завал на іх, разборны
15-38 - 7,3 км - прыток зьлева ад в.Шабуні, кладачка з завалам
16-18 - 8,6 км - першыя дамы в.Зарэчаны, 2 мастка. Другі масток зложаны з ЖБ-пліт. У палаводзьзе трэба быць пільным.
Уздоўж вёскі Зарэчаны сустракаюцца нацянутыя трасы над ракой.
16-51 завал з абносам па левым беразе
17-17 пляж перад мостам
17-22 - 11,6 км - мост шашы на Рудзенск, фініш |
